تحقيقات
ننشر نص التحقيقات فى واقعة سرقة فيللا محمد صلاح
الأحد 20/أغسطس/2023 - 06:04 م
طباعة
sada-elarab.com/695898
المتهمون الـ 3 اتفقوا على فيللا فخر العرب بمدينتى.. والمتهم الأول: أعمل حارسًا بالقرب من فيللا صلاح وظروفى المادية صعبة
حصل صدي العرب على نص التحقيقات فى القضية رقم 4262 لسنة 2023 جنح التجمع الأول، والمتهم فيها 3 أشخاص بسرقة فيللا اللاعب محمد صلاح لاعب نادى ليفربول الإنجليزى.
وأحالت النيابة المختصة المتهمين إلى المحاكمة بعد أن أقروا بارتكاب الجريمة، وسبق عمل أحدهم خفيرًا بمسرح الواقعة منذ عام ونصف، وارتكابه الواقعة لمروره بضائقة مالية وعلمه بخلو المسكن من قاطنيه، واتفاقه مع واحد من المتهمين على ارتكابها، فقصدا المسكن وتمكنا من فتح إحدى نوافذه ودلوفه وسرقة بعض منقولاته، وفرا هاربين، وقد تركا بعضًا من هذه المسروقات لدى المتهم الثالث لإخفائها.
وقال المتهم الأول مصطفى. س، 22 عامًا: اللى حصل إن أنا كنت شغال فى مدينتى من سنتين وبقالى سنة ونص ماشى وكنت مسئول عن 10 فيلات منهم فيلا محمد صلاح، وتعثرت ماديًا بسبب انفصال بدون طلاق بين والدى ووالدتى بسبب مشاكل.
وأضاف: بعد كده والدتى راحت قعدت فى مكان إيجار وأنا اللى كنت بدفع الإيجار وبساعدها فى المصاريف وكنت شغال فى شركة ومشيت منها من شهر وفكرت أنى أسرق فيللا محمد صلاح وأنا كنت عارف إن هو بيجى الفيللا لما بيكون فى ماتشات للمنتخب.
وتابع: أنا كنت عارف إن الباب الخلفى مكسور وبيتقفل بسيخ حديد فكلمت عادل صحبى وقولتله على الفكرة.. قالى والكاميرات قولتله إن الفيللا مفهاش حد قالى لا أنا مش جاى وبعدها بيومين لقيته بيكلمنى بليل وقالى أنا هاجى معاك نسرق الفيللا وقلتله خلاص نتقابل بكرة الصبح.
وأوضح: فعلا اتقابلنا تانى يوم الصبح الساعة 11 صباحا ورحت أنا وهو على شارع مصر بالإسماعيلية عشان نبيع التليفون بتاعى عشان مكنش معانا فلوس المواصلات وبعت التليفون بتاعى بألف جنيه ورحنا على الموقف وركبنا عربية السلام واتحركنا من إسماعيلية ووصلنا السلام حوالى الساعة 4 بليل واتغدينا وقعدنا على القهوة شوية وبعد كده ركبنا من السلام لمدينتى.
وأكمل: إحنا وصلنا حوالى 7 بليل عند بوابة 1 مدينتى وفضلنا واقفين لحد ما باص مدينتى جه وركبنا الباص ووصلنا منطقة الفيلات اللى فيها فيللا محمد صلاح ونزلنا هناك وقعدنا شوية فى الجناين اللى ورا الفيللا عشان نأمن المكان ونشوف إن مفيش أمن بيعدى.
وأردف: لما اتأكدت إن مفيش حد معدى روحت أنا الأول على الباب الخلفى بتاع الفيلا عشان أشوفه ولقيته متصلح وعادل جه ورايا فقالى هنعمل إيه قولت له هنط من على الباب الخلفى والباب فعلا قصير فأنا نطيت ولقيت نور الفيللا منور من جوه واستخبيت فى الشجر اللى موجود فى الجنينة وبعدها بدقيقة عادل نط وجه ورايا واستخبى لحد ما لقينا مفيش صوت ولا حركة فى الفيللا فأنا قولت إن هما سايبين النور مفتوح عشان أى حد يعدى يفتكر إن فيه حد جوا.
وأشار: إحنا روحنا على الباب اللى على الجنينة وحاولنا نبص معرفناش فجبنا أنبوبة ووقفنا عليها وبصينا، وعادل وقتها قالى مفيش حد فى الفيللا وفيشة التلفزيون مفصولة وبعدها لفينا على كل شبابيك الفيلا، مكملًا: إحنا اخترنا شباك ناحية فيلا مهجورة عشان لو عملنا صوت محدش يسمع، وبعدها دورنا فى الجنينة لقينا فاس فحطينا راسه تحت الباب الجرار بتاع الشباك وفضلت أنا وهو ندوس على الإيد الخشب ولقينا سلك الشباك فقطعناه بسكينة المعجون.
المتهم الثالث محمد.أ، سائق توك توك، 21 عامًا، مُدان بإخفاء المسروقات بعد سرقتها من داخل فيللا محمد صلاح، قال خلال التحقيقات: أنا أعرف عادل ومصطفى - المتهمين الأول والثانى سارقى فيللا صلاح - من زمان وفى يوم عادل قالى تعالى عاوزك فى موضوع ولما قعدنا قالنا الموضوع اللى عاوزكم فيه هيعدينا، وأنه كان شغال فى مدينتى والناس هناك معاهم فلوس كتير ومش بيدوروا على الفلوس اللى بتضيع منهم وطلب منى أنى آجى واعتبرها فسحة معاهم.
وأضاف: بعدها سمعتهم وهما بيتفقوا وبيقولوا إن واحد منهم هيبيع تليفونه ولو معرفش يجيب حاجة هيعتبرها فسحة، وأنا قلتلهم أنا مليش علاقة بالموضوع، ومن يوم القعدة دى مشوفتهمش وفى يوم شوفت عادل وعلى ضهره شنطة جملى وراح محل وشفته وهو بيطلع 3 ريسفرات وراح باعهم وقاللى أنا سرقت فيلا محمد صلاح.
وتابع: بعدها لقيته طلع ميدالية فضة من شنطته وبيقولى دى اللى هتعدينا وهنبيعها، وبعدها بفترة شوفت ستورى محمد صلاح إنه اتسرق وكان بيهزر هو وهنيدى وأنا قلتلهم أنتوا مالقتوش غير أشهر واحد فى العالم وتسرقوه وبعدها اتقبض عليا.
وقال الشاهد باسم هانى، مدير أعمال محمد صلاح فى تحقيقات القضية: أنا ماسك شغل صلاح فى القاهرة.. ويوم 12 مارس روحت الفيلا 7 الصبح، مضيفًا أنه فور الدخول لقيت الفيلا مقلوبة.. الأدراج مفتحة فاستغربت لأنها فاضية من شهر.
وأضاف باسم أنه سلك الشباك بالدور الأرضى مقطوع تمامًا، ولاحظ سرقة 4 ريسيفر من الفيللا وأحذية صلاح ومبلغ 75 ألف جنيه، وإن فرد أمن إدارى لاحظ الأمر فأبلغ الشرطة.
وعن تواجده بالفيللا، قال إنه حضر عشان صلاح جاى كمان أسبوع.. فبروح أطمن على الفيللا وأشوف محتاجة إيه. وكشف مدير أعمال صلاح على عدم تسجيل كاميرات الفيللا ما حدث، قائلًا هو فيه كاميرات بس للأسف.. آخر مرة أخو صلاح كان فيها.. فيه حد شال الفيشة بتاعت الكاميرات وحط فيشة المشاية الرياضية ونسى يرجعها تانى.
وسرق المتهمان عادل ومصطفى بعد تسللهما للفيللا عدد من الأحذية الرياضية، وميدالية فضية، وقطعة من الكريستال، وعدد من أجهزة الريسيفر، وأبلغ عن الواقعة مدير أعمال محمد صلاح 12 مارس الماضى وضبطت قوات الأمن المتهمين وأحيلوا للنيابة المختصة ومن ثم المحاكمة.
