طباعة
sada-elarab.com/665618
الناس ثلاثه أنواع حسب تصنيفي..
النوع الأول...
نادرا ما تجده مبتسم .. هو ديما زعلان.. من حال البلد والغلاء وعدم تقدير الناس ليه وحظه السيئ هو ديما يشتكي. بسبب وبدون سبب..
ويبدأ كلامه بكلمه شوفت إلي حصل ثم يبدأ بسرد الأحداث السلبيه م تعرفش بقي هو خايف من الحسد ولا هو أصلا الحاسد الحاقد.. هو ناقم علي حياته غير راضي عند بلده أصلا وغير راضي عن شغله ولا راضي عن دراسته وحاسس إنه غير مقدر من الاخرين وإنه يستحق حياه أفضل و ناس أفضل. هو مش عارف يفرح ولا عارف يفرح إلي حواليه.. شايف في كل حاجه حلوه ثغرات سلبيه وعنده عرقله لكل حلول المشاكل ...
حاول تتجنب هذا النوع من البشر وحاول تبعد عنه نهائيا.. لإنه سوف يسحبك لتحت وسوف يجعلك مهموم طوال الوقت وهيحسسك إنت كبرت وعمرك زاد فجأه ..
هيقنعك بكل الوسائل إنه مفيش أمل للاصلاح وإن المشاكل معقده مش هتتحل أبدا.. وهيشوف نجاحك شئ عادي جدا..
واحتمال يقلل من حماسك وحبك للحياه.. والهاله السلبيه حوله احتمال تجبيلك صداع و وجع في جسمك.
تجنب الكلام معه وحاول تبعد عنه لأنك لو دخلت معاه في دائره الكلام و النقاش هتضيع وقتك ومجهودك هباء....
اهرب منه لإنه صعب يقتنع إنه غلط... المحاوله معاه هدر للوقت والعمر..
ألا بقي لو كان من أقاربك أو أهل بيتك يبقي إنت كده في مشكله حقيقيه وربنا معاك بقي... ولازم نشوف حل آخر غير الإبتعاد والله المستعان.....
النوع الثاني
ده نوع كده منور مبهج مبتسم عنده طاقه للعطاء بيساعد غيره ناجح وعاوز الناس كلها تنجح لإنه مقتنع إن رزق الناس لا يأخذ من رزقه أي شئ.. تشوفه كده جاي من بعيد مبتسم طائر مثل الفراشه حتي لو وزنه زائد... تسأله اخبارك إيه يبدأ بالحمد وبيقولك ده إحنا في نعمه كبيره وفضل ربنا علينا كبير آوي..
مهما كان عنده مشاكل ماليه أو اجتماعيه. يفرح باي حدث صغير ويحاول يجد حل لكل مشكله ويبسطها عليك ويحسسك إن مشاكل الدنيا ديه صغيره آوي والحل الرباني والفرج قريب آوي..
النوع ده مريح جدا في المعاملات الأنسانيه... تمسك بهذا النوع من الاشخاص المحييطين بك بكل الطرق ده طوق النجاه إلي هيساعدك تكمل رحلتك الصعبه..النوع ده حواليه هاله ايجابيه جدا تشعرك بالسعاده و تعلي الروحانيات عندك.. لو عرف إنك بتكافح في الدنيا ولا داخل علي مشروع جديد أو بتذاكر وبتدرس.. يشجعك يدعمك بالكلام يفرح لفرحك بدعيلك ويطبطب عليك بالكلام قبل الأيدي... لو قابلت النوع ده كتير أعرف إنك محظوظ...
القرب منهم سعاده والله و وجود النوع ده معاك رزق رباني حافظ عليه واوعي تزعل النوع ده منك ..
أما بالنسبه للنوع الثالث..
النوع ده محتاج خبير علاقات بشريه علشان يكتشفه بسرعه لإنه ذكي جدا مش هيبان حقيقته غير بعد مرور وقت طويل .. يبان من برا إنه من النوع الثاني وفيه ناس كتير تنخدع فيه بسهوله لإنه من برا هادي راقي ومبتسم ويساعدك أوقات ويسمع أكثر ويعرف كل حاجه عنك وعن الناس كلها فضولي بعض الشئ يهتم بالتفاصيل احيانا لكنه متحفظ.. ومتعرفش عن حياته الشخصيه أي تفاصيل لإنه يخفي عنك حقيقته و دائما تجد في حياته جوانب غير معلن عنها و حكايات مخفيه... النوع ده عنيد جدا رغم إنه راقي ورقيق وهادي جرب بقه تيجي علي مصلحته الشخصيه أو تعركل عناده في اللحظه ديه يظهر وشه الحقيقي عليك وهنا تحدث المفاجأه... حتلاقي حد تآني إنت مش عارفه واحتمال يخسرك علشان فلوس أو أي مصلحه عادي جدا... هو بيقرب لأصحاب المناصب لإنه وصولي ومخترق وعاوز يطلع بسرعه لو علي كتاف أي حد عادي جدا..
ممكن يقرب لك لو له مصلحه معاك وتحس كده إنه لطيف ويحببك فيه آوي و شويه شويه يعمل من كتفك سلم يطلع عليه علشان فجاه يعلي عليك إنت شخصيا...
النوع ده صعب تكتشفه وفيه كثير منهم عايشين معانا
ربنا يحفظنا منهم يارب العالمين
والحديث بقيه...
دكتورة هبة شعوط
دكتوراه العلوم الصحية جامعة الاسكندرية
مقالات وكتاب
تصويت
تابعنا على فيسبوك
تابعنا على تويتر
