محافظات
مركز تدريب صحة المرأة بالجيزة يعلن بدء المرحلة الثانية من تدريب فتيات الجيزة على المشغولات اليدوية تحت شعار “تسلم الإيدين اللي اشتغلت”
الإثنين 29/يوليو/2024 - 11:32 م
طباعة
sada-elarab.com/733105
وتاني مرة "تسلم الإيدين اللي اشتغلت" من شغل المرحلة التانية للخمس سيدات اللي صعدوا للمرحلة التانية من تدريب المشغولات اليدوية و معاهم مشرفين نوادي المرأة التابعة لإدارة تنمية الأسرة بالجيزة أ/إنعام و أ/إيناس، الجمال ده كله اتعمل في قاعة ١ بمركز تدريب صحة المرأة بالجيزة تحت رعاية السيد وكيل وزارة الصحة بالجيزة د/خالد عبد الغني و تحت إشراف مدير إدارة تنمية الأسرة بمديرية الشئون الصحية بالجيزة د/أماني الصياد و مدير مشروع تعزيز برنامج مصر بالجيزة التابع لهيئة "جون سنو" د/رضا سيف؛ وفى حضور د/ أميرة حسن القائم بأعمال مدير مركز تدريب صحة المرأة بالجيزة .
الشغل الجميل ده وغيره نتيجة لمجهود وتدريب بدأوا من سنين و بروتوكول تعاون بين نوادي المرأة التابعة لإدارة منشأة القناطر الصحية و مباردة "كرامتي في حرفتي" اللي بدأها أ/كرم أصلان و كان هدفهم مشترك و هو تدريب المرأة المعيلة على تعلم حرف يدوية تؤهلها إنها تشتغل من بيتها و تساعد نفسها و أسرتها.
السؤال اللي كتير بيسأله هل تدريب السيدات على المشغولات اليدوية مرتبط بس بمشروعات بترعاها هيئات أو مؤسسات دولية؟
الإجابة لأ،
التدريب ده حاليا جزء من المشروع القومي لتنمية الأسرة المصرية برعاية فخامة الرئيس عبد الفتاح السيسي، و المشروع بيمثل خطة استراتيجية تم إعدادها من قِبل عدد من الوزارات و الجهات و اتوضع لها إطار تنفيذي من خلال خمس محاور رئيسية و هى:
١-محور التمكين الاقتصادي: بيقوم على برامج زي تكافل وكرامة وأيضا يستهدف تمكين السيدات من العمل و كسب الرزق عن طريق تدريبهم وتأهيلهم وتمويل مشروعاتهم الصغيرة و المتوسطة.
٢-محور التدخل الخدمي: و يقوم على توفير مستلزمات تنظيم الأسرة بالمجان للجميع و تدريب و تعيين أطباء مدربين على وسائل تنظيم الأسرة.
٣-محور التدخل الثقافي و الإعلامي و التعليمي: و ده هدفه رفع وعي المواطن المصري بكل ما يخص القضايا السكانية و تنمية الأسرة المصرية.
٤-محور التحول الرقمي: و ده هدفه بناء قاعدة بيانات متكاملة لتسهيل تقديم الخدمات الخاصة بتنظيم الأسرة و متابعتها و تقييمها.
٥-المحور التشريعي: يتم فيه التعديلات المقترحة لقوانين زي قانون العقوبات و الأحوال المدنية و الطفل و التعليم و الاستثمار لضبط النمو السكاني و لوقف ظواهر زي عمالة الأطفال و زواج القاصرات و عدم تسجيل المواليد....إلخ.
شرف و يشرف مركز تدريب صحة المرأة بالجيزة إنه شاهد على المجهودات المبذولة لتأهيل و تدريب كل اللي ليه دور في تنفيذ المشروع القومي لتنمية الأسرة المصرية على مستوى محافظة الجيزة، فخور بكل دقيقة تدريب بتمر فيه بيستفيد منها متدرب وبيفيد غيره .
